கோலாலம்பூர்:

நேற்று இரவு சுமார் 8.55 மணியளவில், செத்தியாவங்சா-பந்தாய் விரைவுச்சாலையில் (SPE) ஜாலான் சான் சோ லின் அருகே உள்ள செராமிக் ப்ரோ தொழிற்சாலைக்கு எதிரே இந்த விபத்து நிகழ்ந்தது.

வேகமாக வந்த டிரெய்லர் லோரி ஒன்று கட்டுப்பாட்டை இழந்து நெடுஞ்சாலையின் கான்கிரீட் தடுப்புச் சுவரில் பலமாக மோதியது. மோதிய வேகத்தில், லோரியின் ஓட்டுநர் மற்றும் உதவியாளர் ஆகிய இருவர் மேம்பாலத்திலிருந்து கீழே தூக்கி வீசப்பட்டனர்.

கீழே விழுந்த இரண்டு உள்ளூர் ஆண்களும் உயிரிழந்துவிட்டதை சம்பவ இடத்திற்கு விரைந்த மருத்துவப் பணியாளர்கள் உறுதிப்படுத்தினர். விபத்து குறித்த தகவல் கிடைத்ததும் புடு (Pudu) தீயணைப்பு நிலையத்திலிருந்து 9 வீரர்கள் சம்பவ இடத்திற்கு விரைந்து உடல்களை மீட்டனர்.

உயிரிழந்தவர்கள் இருவரும் உள்ளூர் நபர்கள் எனத் தெரியவந்துள்ளது. அவர்களது உடல்கள் மேலதிக விசாரணைக்காகப் போலீசாரிடம் ஒப்படைக்கப்பட்டுள்ளன.

இந்த விபத்து நடந்த அதே நேரத்தில், அருகிலுள்ள ஒரு கட்டுமானப் பணியிடத்தில் கிரேன் (Crane) தொடர்பான விபத்து ஒன்றும் நிகழ்ந்தது. இதில் பாகிஸ்தான் நாட்டைச் சேர்ந்த ஒருவருக்குக் காலில் பலத்த காயம் ஏற்பட்டு, அவர் மருத்துவமனையில் அனுமதிக்கப்பட்டுள்ளார்.