பகாங் மாநிலத்தின் குவாந்தான், லோரோங் செராட்டிங் டாமாய் பகுதியில் உள்ள ஒரு வீட்டில் இன்று காலை ஒரே குடும்பத்தைச் சேர்ந்த ஐந்து பேர் கொலை செய்யப்பட்ட நிலையில் சடலங்களாகக் கண்டெடுக்கப்பட்டனர். இந்தத் துயரச் சம்பவம் இன்று காலை 7 மணியளவில் நிகழ்ந்திருக்கலாம் என்று குவாந்தான் மாவட்ட காவல்துறைத் தலைவர் ஏசிபி அஷாரி அபு சாமா உறுதிப்படுத்தியுள்ளார்.

சம்பவம் நடந்த இடத்தில் தடயவியல் நிபுணர்கள் தீவிர சோதனையில் ஈடுபட்டுள்ளனர். இன்று காலை 10:10 மணி வரை பாதிக்கப்பட்ட ஐந்து பேரின் உடல்களும் வீட்டிற்குள்ளேயே இருந்தன, அவை இன்னும் அங்கிருந்து அகற்றப்படவில்லை. காவல்துறையினர் அந்தப் பகுதியைச் சுற்றி வளைத்து, பொதுமக்கள் நுழையாதபடி தடுத்துத் தங்களது முதற்கட்ட விசாரணையை முடுக்கிவிட்டுள்ளனர்.

இந்தக் கொடூரச் சம்பவம் குறித்து கேள்விப்பட்டு உயிரிழந்தவர்களின் உறவினர்கள் மற்றும் அண்டை வீட்டார் அந்த வீட்டின் முன் திரண்டதால் அந்த இடமே சோகமாகக் காணப்படுகிறது. பகாங் மாநில காவல்துறைத் தலைவர் டத்தோஸ்ரீ யஹாயா ஒஸ்மான் நேரில் வந்து ஆய்வு நடத்தினார். இந்த மர்ம மரணங்கள் மற்றும் கொலைக்கான பின்னணி குறித்து விரிவான தகவல்களை வழங்க அவர் விரைவில் செய்தியாளர் சந்திப்பை நடத்துவார் என்று எதிர்பார்க்கப்படுகிறது.

ஒரே குடும்பத்தைச் சேர்ந்த ஐந்து பேர் கொல்லப்பட்ட இந்தச் சம்பவம் குவாந்தான் மக்கள் மட்டுமின்றி மலேசியா முழுவதையும் பெரும் அதிர்ச்சியில் ஆழ்த்தியுள்ளது. உயிரிழந்தவர்களின் அடையாளம் மற்றும் கொலையாளி குறித்த விபரங்கள் போலீஸ் விசாரணைக்குப் பின்னரே முழுமையாகத் தெரியவரும்.