இந்தியத் திரையுலகின் பிரம்மாண்ட இயக்குனர் சஞ்சய் லீலா பன்சாலி, தனது அடுத்த பிரம்மாண்ட தயாரிப்பான 'ஜெய் சோம்நாத்' (Jai Somnath) குறித்த அறிவிப்பை அதிகாரப்பூர்வமாக வெளியிட்டுள்ளார். இந்தப் படத்தை பிரபல இயக்குனர் கேதன் மேத்தா இயக்கவுள்ளார். குஜராத்தின் புகழ்பெற்ற சோம்நாத் கோவில் மீது கி.பி. 1025-1026 காலப்பகுதியில் கஜினி முகமது நடத்திய தாக்குதல் மற்றும் அதன் சிதைவுகளை மையமாகக் கொண்டு இந்தப் படம் உருவாகிறது.

சோம்நாத் கோவில் மீதான கஜினி முகமதுவின் தாக்குதல் நடந்து சரியாக 1000 ஆண்டுகள் நிறைவடைவதை முன்னிட்டு இந்தப் படம் அறிவிக்கப்பட்டுள்ளது. "ஒரு கோவிலை உடைக்கலாம், ஆனால் நம்பிக்கையை அல்ல" என்ற வாசகத்துடன் படத்தின் போஸ்டர் சமூக வலைதளங்களில் பகிரப்பட்டுள்ளது. இந்தியாவின் அழியாத ஆன்மீக உணர்வையும், இந்திய நாகரிகத்தின் பெருமையையும் பறைசாற்றும் விதமாக இந்தத் திரைப்படம் அமையும் என்று படக்குழுவினர் தெரிவித்துள்ளனர்.

பன்சாலி புரொடக்ஷன்ஸ் மற்றும் மாயா மூவீஸ் இணைந்து தயாரிக்கும் இந்தப் படத்திற்கு கேதன் மேத்தா கதை எழுதியுள்ளார். இந்திய வரலாற்றின் ஒரு முக்கிய அத்தியாயத்தை மிகப்பிரம்மாண்டமாக திரையில் கொண்டு வரத் திட்டமிடப்பட்டுள்ள இந்தப் படம், வரும் 2027-ஆம் ஆண்டு உலகம் முழுவதும் உள்ள திரையரங்குகளில் வெளியாகும் என்று அறிவிக்கப்பட்டுள்ளது.

வரலாற்றுப் பின்னணி கொண்ட படங்களைத் தயாரிப்பதில் புகழ்பெற்ற சஞ்சய் லீலா பன்சாலி மற்றும் சிறந்த படைப்பாளி கேதன் மேத்தா ஆகியோரின் கூட்டணி இந்தப் படத்தின் மீதான எதிர்பார்ப்பை அதிகரித்துள்ளது. அழிவுக்குப் பின் அக்கோவில் மீண்டும் எப்படி உயிர்பெற்றது (Resurrection) என்பது போன்ற வீரஞ்செறிந்த கதைக் களத்தை ரசிகர்கள் திரையில் எதிர்பார்க்கலாம்.