மத்திய கிழக்கில் ஈரான், இஸ்ரேல் மற்றும் அமெரிக்கா இடையே ஏற்பட்டுள்ள போர் பதற்றம் காரணமாக உலகப் பொருளாதாரத்தில் பெரும் பாதிப்பு ஏற்பட்டுள்ளது. சர்வதேசச் சந்தையில் இன்று காலை கச்சா எண்ணெய் விலை (Brent Crude) திடீரென 7% அதிகரித்து, ஒரு பீப்பாய் 82 டாலரைத் தாண்டியுள்ளது. ஈரானின் கடற்படைத் தலைமையகங்கள் அழிக்கப்பட்டதாகவும், ஹார்முஸ் ஜலசந்தி (Strait of Hormuz) மூடப்பட்டதாகவும் வெளியாகும் தகவல்களால் சர்வதேசக் கப்பல் போக்குவரத்து முற்றிலும் முடங்கும் அபாயம் ஏற்பட்டுள்ளது.
இந்தத் திடீர் விலை உயர்வு காரணமாக இந்தியா உள்ளிட்ட ஆசிய நாடுகளில் பெட்ரோல் மற்றும் டீசல் விலை உயரும் சூழல் உருவாகியுள்ளது. வளைகுடா நாடுகளில் இருந்து வரும் எண்ணெய் விநியோகம் தடைபடுவதால், உலகளாவிய விநியோகச் சங்கிலி (Supply Chain) பாதிக்கப்பட்டு அத்தியாவசியப் பொருட்களின் விலை அதிகரிக்கக்கூடும் எனப் பொருளாதார நிபுணர்கள் எச்சரித்துள்ளனர். குறிப்பாக விமான எரிபொருள் விலை அதிகரிப்பால் சர்வதேச விமானக் கட்டணங்கள் பல மடங்கு உயர வாய்ப்புள்ளது.
சிங்கப்பூர் ஏர்லைன்ஸ் உள்ளிட்ட பல சர்வதேச விமான நிறுவனங்கள் மத்திய கிழக்கு நாடுகளுக்கான தங்களது சேவைகளை இன்று முதல் காலவரையறையின்றி ரத்து செய்துள்ளன. உலகின் முக்கிய வர்த்தகப் பாதையான வளைகுடா பகுதியில் போர் கப்பல்கள் குவிக்கப்பட்டுள்ளதால், வணிகக் கப்பல்கள் மாற்றுப் பாதைகளைத் தேடிச் செல்ல வேண்டிய நிலை ஏற்பட்டுள்ளது. இது உலக நாடுகளுக்கு இடையே ஒரு பொருளாதார நெருக்கடியை உருவாக்கும் என அஞ்சப்படுகிறது.
