பிரதமர் டான் ஸ்ரீ அன்வார் இப்ராஹிம், தரம் 15 மற்றும் அதற்குக் கீழுள்ள அனைத்து அரசு ஊழியர்களுக்கும் 500 ரிங்கிட் சிறப்பு நிதியுதவி வழங்கப்படும் என இன்று அறிவித்துள்ளார். இதனுடன், சுமார் 70,000 மதப் பணியாளர்கள், இமாம்கள் மற்றும் காஃபா (KAFA) ஆசிரியர்களுக்கும் தலா 500 ரிங்கிட் நிதியுதவி வழங்கப்படும். இந்தத் தொகையானது வரும் மார்ச் 13-ம் தேதி முதல் விநியோகிக்கப்படும் என்று அவர் உறுதி அளித்துள்ளார். 

அரசு ஓய்வூதியதாரர்கள் மற்றும் படைவீரர்களுக்கு 250 ரிங்கிட் சிறப்புத் தொகை அதே தேதியில் வழங்கப்படும் என்றும் அறிவிக்கப்பட்டுள்ளது. இந்த நிதியுதவிக்கு வருமான வரி விலக்கு அளிக்கப்படும் என்பதும் குறிப்பிடத்தக்கது. நடுத்தர மற்றும் குறைந்த வருமானம் கொண்ட பிரிவினருக்கு ஆதரவாகவும், வாழ்வாதாரச் செலவுகளைக் குறைக்கவும் இந்த நடவடிக்கையை அரசு மேற்கொண்டுள்ளதாகப் பிரதமர் தனது உரையில் குறிப்பிட்டார். 

மேலும், சும்பங்கன் துனை ரஹ்மா (STR) இரண்டாம் கட்டக் கொடுப்பனவுகள் நாளை (மார்ச் 10) முதல் முன்கூட்டியே வழங்கப்படும் என்றும் பிரதமர் அறிவித்துள்ளார். மத்திய கிழக்கில் நிலவும் நிச்சயமற்ற சூழலைக் கருத்தில் கொண்டு மக்கள் பணத்தை விவேகமாகச் செலவிடுமாறு அவர் கேட்டுக்கொண்டார்.