கோலாலம்பூர்:

மத்திய கிழக்கு மற்றும் மேற்காசிய பிராந்தியங்களில் தீவிரமடைந்து வரும் போர்ச் சூழலை முடிவுக்குக் கொண்டுவர எடுக்கப்படும் அனைத்து நியாயமான மற்றும் நம்பகத்தன்மை கொண்ட முயற்சிகளுக்கு ஆதரவு வழங்க மலேசியா தயாராக இருப்பதாகப் பிரதமர் டத்தோஸ்ரீ அன்வார் இப்ராகிம் தெரிவித்துள்ளார்.

இது குறித்து இன்று (திங்கட்கிழமை) தனது சமூக ஊடகப் பக்கத்தில் அவர் வெளியிட்டுள்ள அறிக்கையின் முக்கிய அம்சங்கள்:

பிராந்தியத்தில் நிலவும் கருத்து வேறுபாடுகள் மற்றும் பூசல்களுக்குப் போர் தீர்வாகாது என்று குறிப்பிட்ட பிரதமர், பதற்றத்தைத் தணித்து அமைதியை நிலைநாட்ட முன்னெடுக்கப்படும் அரசதந்திர (Diplomatic) முயற்சிகளுக்கு மலேசியா முழு ஒத்துழைப்பு வழங்கும் என்றார். பேச்சுவார்த்தைகள் அனைத்தும் வெளிப்படையான மனோபாவத்துடன் அமைய வேண்டும் என்பதையும் அவர் வலியுறுத்தினார்.

“மலேசிய நாடாளுமன்றத்தின் ஒருமித்த நிலைப்பாட்டின் அடிப்படையில், ஈரானிய உயர்மட்டத் தலைமை விடுத்துள்ள ‘கட்டுப்பாட்டைப் பேணும்’ (Restraint) அழைப்பை நான் வரவேற்கிறேன்,” என்று அன்வார் குறிப்பிட்டுள்ளார். அமைதிக்கான இத்தகைய குரல்கள் சர்வதேச சமூகத்தால் மதிக்கப்பட வேண்டும் என்றும் அவர் நினைவூட்டினார்.

சம்பந்தப்பட்ட நாடுகள் உணர்ச்சிவசப்பட்டுத் தீவிரமான ராணுவ நடவடிக்கைகளில் இறங்குவதைத் தவிர்க்க வேண்டும் என்று எச்சரித்த அவர், “அவசரப்பட்டு எடுக்கப்படும் தீவிர நடவடிக்கைகளின் விளைவுகள் எவ்வளவு பயங்கரமானவை என்பதை வரலாறு நமக்கு ஏற்கனவே உணர்த்தியுள்ளது,” என்று சுட்டிக்காட்டினார்.

மத்திய கிழக்கு பிராந்தியத்தில் பல்வேறு நாடுகள் மீது நடத்தப்படும் தொடர் தாக்குதல்கள் மிகுந்த அதிர்ச்சியளிப்பதாகத் தெரிவித்த பிரதமர், நிலைமை மேலும் மோசமடைவதைத் தடுக்க உலக நாடுகள் ஒன்றிணைய வேண்டும் எனக் கேட்டுக்கொண்டார்.