மலேசிய அரசு ஊழியர்களுக்கு அடுத்த புதன்கிழமை முதல் ‘வீட்டிலிருந்தே வேலை’ (WFH) செய்யும் கொள்கை அமல்படுத்தப்படும் என்று பொருளாதார அமைச்சர் அக்மல் நஸ்ருல்லாஹ் முகமது நசீர் அறிவித்துள்ளார். இது கோவிட்-19 காலத்தைப் போல நடமாட்டக் கட்டுப்பாடுகளுக்காக அல்லாமல், தற்போதைய சவால்களுக்கு மத்தியில் அரசுப் பணிகளின் உற்பத்தித் திறனைப் பராமரிப்பதற்காவே கொண்டு வரப்படுகிறது. இந்தத் திட்டம் நாட்டின் பொருளாதாரச் செயல்பாடுகளை எந்தவிதத்திலும் பாதிக்காது என்று அவர் உறுதியளித்துள்ளார். 

உள்நாட்டு விநியோகச் சங்கிலிகளைப் பாதுகாப்பதற்கும், அத்தியாவசியப் பொருட்களின் தட்டுப்பாட்டைத் தவிர்ப்பதற்கும் தேசிய பொருளாதார நடவடிக்கை கவுன்சில் மூலம் அரசு முன்னெச்சரிக்கை நடவடிக்கைகளை எடுத்துள்ளதாக அவர் குறிப்பிட்டுள்ளார். வதந்திகளால் மக்கள் பீதியடைந்து பொருட்களை வாங்குவதைத் தவிர்க்க வேண்டும் என்றும், உணவு மற்றும் அத்தியாவசியப் பொருட்களின் இருப்பு தொடர்ந்து கண்காணிக்கப்பட்டு வருவதாகவும் அமைச்சர் தெரிவித்துள்ளார்.

இதன் மூலம் அரசு ஊழியர்கள் தங்கள் இருப்பிடத்திலிருந்தே அர்ப்பணிப்புடன் பணியாற்ற முடியும், அதே நேரத்தில் நாட்டின் பொருளாதார ஓட்டம் சீராக இருக்கும். எரிசக்தி மற்றும் பிற வளங்களைச் சிக்கனமாகப் பயன்படுத்தவும், அதே சமயம் சேவைகளின் தரம் குறையாமல் இருக்கவும் இந்த மாற்றம் ஒரு தீர்வாகப் பார்க்கப்படுகிறது.