மக்கள் நீதி மய்யத்தின் தலைவரும், உலக நாயகனுமான கமல்ஹாசன், தமிழகத்தின் புதிய முதலமைச்சரான சி. ஜோசப் விஜய்யை நேரில் சந்தித்து வாழ்த்துக்களைத் தெரிவித்தார். இந்த சந்திப்பின் போது, தமிழ் திரைத்துறையின் வளர்ச்சிக்காக ஆறு முக்கிய கோரிக்கைகள் அடங்கிய மனுவை அவர் சமர்ப்பித்தார். தமிழகத்தில் சமீபத்தில் நடந்து முடிந்த சட்டமன்றத் தேர்தலுக்குப் பிறகு விஜய் முதல்வராகப் பொறுப்பேற்ற பின்னணியில் இச்சந்திப்பு நிகழ்ந்துள்ளது.
கமல்ஹாசனின் முக்கிய கோரிக்கைகளில் ஒன்றாக, தமிழ் சினிமா, சுயாதீன திரைப்படங்கள் மற்றும் ஆவணப்படங்களை ஏழை மக்கள் மலிவு விலையில் பார்க்கும் வகையில் அரசு சார்பிலான தனித்துவமான OTT தளம் ஒன்றை (State-owned OTT Platform) தொடங்க வேண்டும் என்று வலியுறுத்தினார். இது நலிவடைந்த தயாரிப்பாளர்கள் மற்றும் சிறிய பட்ஜெட் படங்களுக்கு ஒரு பெரிய வரப்பிரசாதமாக அமையும் என்று அவர் சுட்டிக்காட்டினார்.
மேலும், தற்போதைய சூழலில் திரைப்பட தயாரிப்பு மற்றும் திரையரங்கு பராமரிப்பு செலவுகள் கணிசமாக உயர்ந்துள்ளதை அவர் எடுத்துரைத்தார். இதனைச் சமாளிக்க, தற்போது விதிக்கப்பட்டு வரும் 4 சதவீத உள்ளாட்சி பொழுதுபோக்கு வரியை (Local Body Entertainment Tax) முற்றிலுமாக ரத்து செய்ய வேண்டும் என்றும் முதலமைச்சர் விஜய்யிடம் கமல்ஹாசன் கோரிக்கை விடுத்துள்ளார்.
