ஏர்ஏசியா எக்ஸ் (AirAsia X) நிறுவனம் முன்பதிவு செய்திருந்த 15 ‘ஏர்பஸ் ஏ330-900’ (Airbus A330-900) ரக விமானங்களின் ஆர்டர், இருதரப்பு பரஸ்பர உடன்பாட்டின் அடிப்படையில் ரத்து செய்யப்பட்டுள்ளதாக ஏர்பஸ் நிறுவனம் அதிகாரப்பூர்வமாக உறுதிப்படுத்தியுள்ளது.
இதுகுறித்து பெர்னாமா (Bernama) செய்தி நிறுவனத்திடம் பேசிய ஏர்பஸ் செய்தித் தொடர்பாளர், “இருதரப்பு ஒத்திசைவுடன் இந்த ஆர்டர் ரத்து செய்யப்பட்டுள்ளது உண்மைதான்,” எனத் தெரிவித்துள்ளார்.
இருப்பினும், இந்த விவகாரம் குறித்து கருத்து தெரிவிக்க ஏர்ஏசியா எக்ஸ் நிறுவனம் மறுத்துவிட்டது.
ஏர்ஏசியா குழுமம் (AirAsia Group) தற்போது நீண்ட தூரம் பயணிக்கக்கூடிய நாரோபாடி (Long-range narrowbodies) ரக சிறிய விமானங்களை நோக்கி தனது கவனத்தைத் திருப்பியுள்ளதே இந்த ஆர்டர் ரத்து செய்யப்படுவதற்குக் காரணம் என்று கூறப்படுகிறது.
முன்னதாக, ஏர்ஏசியா எக்ஸ் ஆர்டர் செய்திருந்த அனைத்து ஏ330நியோ (A330neo) ரக விமானங்களும், கோலாலம்பூர் மற்றும் லண்டன் இடையே நேரடிச் சேவைகளை வழங்கும் திறன் கொண்ட பெரிய மாடல்களான ஏ330-900 ஆகும்.
தற்போது இந்த ஆர்டர் ரத்து செய்யப்பட்டுள்ள வேளையில், தனது நெட்வொர்க் விரிவாக்கத் திட்டங்களின் ஒரு பகுதியாக, இந்த ஆண்டின் தொடக்கத்தில் ஏர்ஏசியா குழுமம் 50 ‘ஏர்பஸ் ஏ321எக்ஸ்எல்ஆர்’ (Airbus A321XLR) ரக விமானங்களுக்கான புதிய ஆர்டரை வழங்கியுள்ளது குறிப்பிடத்தக்கது.
