சமூக ஊடகங்களில் பரவிய படம் ‘AI’ போலிப் படம் என மாநகராட்சி முற்றுப்புள்ளி!
பேராக் மாநிலம், ஈப்போ நகரின் புகழ்பெற்ற பெயர் அடையாளப் பலகையின் (Ipoh Landmark Signboard) அருகில் சீன எழுத்துகள் இடம்பெற்றுள்ளது போல் சமூக ஊடகங்களில் பரவி வரும் படம், செயற்கை நுண்ணறிவு (AI) மூலம் உருவாக்கப்பட்ட முற்றிலும் போலிப் படம் என ஈப்போ மாநகராட்சி (MBI) விளக்கம் அளித்துள்ளது.
இத்தகைய போலியான படங்கள் பொதுமக்களிடையே தேவையில்லாத குழப்பத்தையும் அச்சத்தையும் ஏற்படுத்துவதோடு, வரலாற்றுச் சிறப்புமிக்க ஈப்போ நகரின் நற்பெயருக்குக் களங்கம் விளைவிக்கும் வகையில் அமைந்துள்ளதாக மாநகராட்சி தனது அறிக்கையில் சுட்டிக்காட்டியுள்ளது.
“ஈப்போ தற்போது சீனாவின் பெய்ஜிங் நகரத்தின் ஒரு மாவட்டத்தைப் போல் மாறி வருகிறது” என்ற சர்ச்சைக்குரிய வாசகத்துடன், இந்த போலிப் படம் முகநூல் (Facebook) குழு ஒன்றில் பதிவிடப்பட்டு வேகமாகப் பரவியது.
இந்த போலிப் படத்தை உருவாக்கி, சமூக ஊடகங்களில் வதந்தியைப் பரப்பிய நபர்கள் குறித்துக் காவல் துறை மற்றும் சம்பந்தப்பட்ட அதிகாரிகளால் தீவிர விசாரணை நடத்தப்பட்டு வருகிறது.
சுமார் 17 ஆண்டுகளாகக் குனுங் லாங் (Gunung Lang) மலைக்கு அருகில் கம்பீரமாக வீற்றிருக்கும் இந்த “IPOH” பெயர் அடையாளச் சின்னமானது, வழக்கமான பராமரிப்பு மற்றும் புனரமைப்புப் பணிகளுக்காகவே கடந்த ஜூலை 15-ஆம் தேதி தற்காலிகமாக அகற்றப்பட்டது.
பராமரிப்புப் பணிகள் அனைத்தும் விரைவாக நிறைவடைந்த பின்னர், வரும் ஆகஸ்ட் 4 முதல் ஆகஸ்ட் 6-ஆம் தேதிக்குள் அதே இடத்தில் “IPOH” பெயர் அடையாளச் சின்னம் மீண்டும் பழைய பொலிவுடன் நிறுவப்படும் என ஈப்போ மாநகராட்சி உறுதிபடத் தெரிவித்துள்ளது.
