சிலாங்கூர், அம்பாங் ஜெயா பகுதியில் உள்ள தேசியப் பள்ளிக்கு அருகில் அமைந்துள்ள மாமாக் உணவகம் மற்றும் பொருட்கள் சேமிப்புக் கிடங்கு ஆகியவை நள்ளிரவில் ஏற்பட்ட பயங்கர தீ விபத்தில் முற்றிலும் எரிந்து சேதமடைந்துள்ளன.

இன்று அதிகாலை சுமார் 3.00 மணியளவில் இத்தீ விபத்து குறித்து அவசர அழைப்பு வரப்பெற்றதைத் தொடர்ந்து, அம்பாங் தீயணைப்பு மற்றும் மீட்பு நிலையத்தைச் சேர்ந்த வீரர்கள் உடனடியாகச் சம்பவ இடத்திற்கு விரைந்தனர்.

வெவ்வேறு உரிமையாளர்களுக்குச் சொந்தமான இந்த இரண்டு கட்டிடங்களும் சுமார் 80 சதவீதம் வரை தீயில் கருகி சேதமடைந்துள்ளதாகச் சிலாங்கூர் மாநிலத் தீயணைப்பு மற்றும் மீட்புத் துறையின் நடவடிக்கை உதவி இயக்குநர் அஷ்ருல் ரிஸால் அஷ்பார் தெரிவித்தார்.

தீயின் வீரியம் அதிகமாக இருந்ததால், பண்டான் இண்டா, கெராமாட் மற்றும் ஹங் துவா ஆகிய தீயணைப்பு நிலையங்களைச் சேர்ந்த 19 வீரர்கள் வரவழைக்கப்பட்டு, தீவிர போராட்டத்திற்குப் பின்னரே தீ கட்டுக்குள் கொண்டுவரப்பட்டது.

தீயணைப்பு வீரர்களின் விரைவான மற்றும் திறம்படச் செயல்பட்ட நடவடிக்கையால் தீ மேலும் பரவாமல் தடுக்கப்பட்டுப் பெரும் அசம்பாவிதம் தவிர்க்கப்பட்டது. இச்சம்பவத்தில் அதிர்ஷ்டவசமாக உயிர்ச்சேதமோ அல்லது எவருக்கும் காயங்களோ ஏற்படவில்லை என்றும், தீ விபத்துக்கான உண்மையான காரணம் குறித்துத் துறையினர் தீவிர விசாரணை நடத்தி வருவதாகவும் அவர் மேலும் உறுதிப்படுத்தினார்.