அலோர் காஜா: வரவிருக்கும் மாநிலத் தேர்தலில், மீண்டும் முதலமைச்சர் பதவியைப் பெறுவது தனது நோக்கம் அல்ல என்றும், மாறாக பாரிசான் நேசனல் கூட்டணி வாக்காளர்களிடமிருந்து வலுவான ஆணையைப் பெறுவதை உறுதி செய்வதே தனது முதன்மை நோக்கம் என்றும் மலாக்கா பாரிசான் நேசனல் தலைவர் அப்துல் ரவூஃப் யூசோப் தெரிவித்துள்ளார். மாநிலத்தில் பாரிசான் நேஷனல் தொடர்ந்து ஆட்சியில் இருப்பதை உறுதி செய்வதன் மூலம், அரசியல் நிலைத்தன்மையைத் தக்கவைக்கவே தான் பாடுபடுவதாக அவர் கூறினார்.

மீண்டும் முதலமைச்சராக நியமிக்கப்படுவேன் என்பது அரசியலில் நான் நீடிப்பதற்கான தூண்டுதல் அல்ல. வெற்றி பெறுவதற்கு நாம் கடுமையாக உழைப்பதே மிக முக்கியமானது. தேர்தலில் வெற்றி பெறத் தவறிவிட்டால், (பதவிகளைப் பற்றி) கற்பனை செய்து பார்ப்பதில் எந்தப் பயனும் இல்லை என்று அவர் எஃப்.எம்.டி  ஊடகத்திடம் தெரிவித்தார். நவம்பர் 14ஆம் தேதி நடைபெறவுள்ள மலாக்கா மாநிலத் தேர்தலில் பாரிசான் நேஷனல் வெற்றி பெற்று ஆட்சியைத் தக்கவைத்துக் கொண்டால், அப்துல் ரவூஃப் முதலமைச்சர் பதவிக்கு முன்மொழியப்படுவார் என்று அக்கட்சியின் தலைவர் அகமது ஜாஹிட் ஹமிடி கூறியதைத் தொடர்ந்து, அப்துல் ரவூஃப் இவ்வாறு பதிலளித்தார்.

சுலைமான் எம்.டி. அலிக்குப் பிறகு, 2023 மார்ச் மாதம் மலாக்காவின் 13-வது முதலமைச்சராக அப்துல் ரவூஃப் பதவியேற்றார். தஞ்சோங் பிடாரா தொகுதியில் மீண்டும் போட்டியிடும் அப்துல் ரவூஃப், அதிகப்படியான தன்னம்பிக்கை (overconfidence) தன்னை ஆதிக்கம் செலுத்த அனுமதிக்க மாட்டேன் என்று கூறினார். கட்சியின் திறன் மற்றும் எனது அனுபவம் ஆகியவற்றுக்கு ஈடாக மற்றவர்கள் இருக்க முடியாது என்று நான் நம்புகிறேன்.

பெரும்பான்மையினராக மலாய்க்காரர்களைக் கொண்ட இந்தத் தொகுதி, அம்னோவின் கோட்டையாகக் கருதப்படுகிறது. இருப்பினும், கடந்த மாநிலத் தேர்தலில், மும்முனைப் போட்டியில் 3,559 வாக்குகளைப் பெற்று, 364 வாக்குகள் என்ற மிகக் குறைந்த வித்தியாசத்திலேயே அப் ரவூஃப் வெற்றி பெற்றார். அப்போது பெர்சத்து கட்சியைச் சேர்ந்த மாஸ் எர்மியாதி சம்சுடின், 3,195 வாக்குகளைப் பெற்று இரண்டாவது இடத்தைப் பிடித்தார். இந்த முறை, பாக்காத்தான் ஹராப்பான் கூட்டணியின் யுனாஸ்ரி முஸ்தமிரியுடன் அப்துல் ரவூஃப் நேரடியாகப் போட்டியிடுகிறார்.

பிரபலமான நபர்கள் என்பதால் மட்டுமே தொகுதி மக்களுக்குப் பயன் கிடைத்துவிடாது என்றும், குறிப்பாக அவர்கள் அந்த உள்ளூர் பகுதியைச் சேர்ந்தவர்களாக இல்லாவிட்டால் அது இன்னும் கடினம் என்றும் அப் ரவூஃப் குறிப்பிட்டார். சமூகத்தின் தேவைகளையும் அவர்களின் வாழ்க்கை முறையையும் புரிந்துகொள்வது அவசியம் என்று அவர் மேலும் கூறினார். மக்கள் பிரதிநிதியாக வருவதற்கு முன்பாக, ஒருவர் தான் பிரதிநிதித்துவப்படுத்த விரும்பும் சமூகத்துடன் ஒன்றிணைந்திருக்க வேண்டும்.