இந்தியா வழியாக ஐரோப்பாவிற்கு பயணிக்கும் மலேசியர்கள், இணைப்பு விமானங்களில் ஏறுவதற்கு முன்பு ஐரோப்பிய எல்லை அதிகாரிகளால் கூடுதல் சோதனைக்கு உட்படுத்தப்படுவார்கள். போக்குவரத்து பயணிகளுக்கான பயணிகள் விவரக்குறிப்பு நடைமுறைகள் குறித்து ஐரோப்பிய அதிகாரிகள் கடுமையான விதிகளை அமல்படுத்தியுள்ளதே இதற்குக் காரணம் என்று புதுடில்லியில் உள்ள மலேசிய தூதரகம் ஒரு பேஸ்புக் பதிவில் குறிப்பிட்டுள்ளது.
இந்த நடைமுறைக்கு இணங்காததால் மலேசியா திரும்புவதற்கு தூதரக உதவியை நாடும் மலேசிய பயணிகளின் எண்ணிக்கை அதிகரித்து வருகிறது. எனவே, பாஸ்போர்ட், விசாக்கள், திரும்பும் விமான டிக்கெட்டுகள் உள்ளிட்ட அனைத்து பயண ஆவணங்களும் செல்லுபடியாகும் மற்றும் முழுமையானவை என்பதை பயணிகள் உறுதி செய்ய அறிவுறுத்தப்படுகிறார்கள்.
தங்குமிடம் முன்பதிவுகள், பயணத் திட்டங்கள், போதுமான நிதி ஆதாரம் போன்ற துணை ஆவணங்களை வழங்க பயணிகள் தயாராக இருக்க வேண்டும். புறப்படுவதற்கு முன் மலேசியாவில் உள்ள தொடர்புடைய விமான நிறுவனம் அல்லது ஐரோப்பிய தூதரகத்துடன் சமீபத்திய தேவைகளைச் சரிபார்க்குமாறும் கேட்டுக் கொள்ளப்படுகிறார்கள்.
தேவையற்ற சிரமம், நிதி இழப்பைத் தவிர்க்க இந்த ஆலோசனையை கவனத்தில் கொள்ளுமாறு அனைத்து மலேசிய குடிமக்களையும் மலேசிய தூதரகம் கேட்டுக் கொண்டுள்ளது. தூதரக உதவிக்கு, மலேசியர்கள் உயர் ஸ்தானிகராலயத்தைத் தொடர்பு கொள்ளலாம்.
