இஸ்கந்தர் புத்திரியிலுள்ள லிமா கடாய் டோல் பிளாசா அருகே சட்டவிரோத மோட்டார் சைக்கிள் பந்தயம் மற்றும் வீதி வன்முறைகளில் ஈடுபட்ட நபர்களை இலக்கு வைத்து காவல் துறையினரும் மலேசிய சாலைப் போக்குவரத்துத் துறையினரும் (JPJ) இணைந்து நடத்திய அதிரடிச் சோதனையில் 43 மோட்டார் சைக்கிள்கள் பறிமுதல் செய்யப்பட்டன.

கூட்டரசு போக்குவரத்து அமலாக்கம் மற்றும் புலனாய்வுப் பிரிவுப் போலீசாரும், மாநில சாலைப் போக்குவரத்துத் துறை அதிகாரிகளும் இணைந்து நேற்று இந்நடவடிக்கையைச் செயல்படுத்தினர்.

“இச்சோதனை நடவடிக்கையின் போது 15 முதல் 30 வயதுக்குட்பட்ட 5 பெண்க உட்பட மொத்தம் 57 வாகன ஓட்டிகள் தீவிர தணிக்கைக்கு உட்படுத்தப்பட்டனர். பல்வேறு வீதி விதிமீறல்களுக்காகக் காவல் துறை சார்பில் 112 அபராத அழைப்பாணைகளும் (Summonses), JPJ சார்பில் 106 நோட்டீஸ்களும் வழங்கப்பட்டதாக” இஸ்கந்தர் புத்திரி பொறுப்பு மாவட்டக் காவல் துறைத் தலைவர், சூப்ரெண்டன்ட் சைஃபுல்லா ஜெயா @ யஹாயா கூறினார்.

விதிமீறல்களில் ஈடுபட்ட 43 மோட்டார் சைக்கிள்கள் 1987-ஆம் ஆண்டு சாலைப் போக்குவரத்துச் சட்டத்தின் பிரிவு 64-இன் கீழ் காவல் துறையினரால் பறிமுதல் செய்யப்பட்டன.

மாவட்டத்தில் பொதுமக்களின் பாதுகாப்பையும் அமைதியையும் பேணவும், சட்டவிரோத பைக் பந்தயங்களைக் கட்டுப்படுத்தவும் இதுபோன்ற கூட்டு அமலாக்க நடவடிக்கைகள் தொடர்ந்து தீவிரமாக மேற்கொள்ளப்படும் எனச் சைஃபுல்லா ஜெயா உறுதியளித்தார்.