கோலாலம்பூர்: மியான்மருக்குத் திருப்பி அனுப்பப்படும் நபர்கள் அங்கு துன்புறுத்தலுக்கோ, சித்திரவதையக்கோ அல்லது உயிருக்கு ஆபத்தான அச்சுறுத்தல்களுக்கோ உள்ளாவார்கள் என்பதற்குத் தெளிவான ஆதாரங்களோ அல்லது அபாயமோ இருந்தால், அவர்கள் எவரும் திருப்பி அனுப்பப்பட மாட்டார்கள் என்று டத்தோ ஸ்ரீ சைஃபுதீன் நசுத்தியோன் இஸ்மாயில் தெரிவித்துள்ளார்.  திருப்பி அனுப்பும் செயல்பாட்டில், அவர்களின் பாதுகாப்பு, நலன், மனித உரிமைகளுக்கு அரசாங்கம் முன்னுரிமை அளிப்பதாக உள்துறை அமைச்சர் கூறினார். திருப்பி அனுப்பப்படும் நபர்களின் பாதுகாப்பு குறித்து மியான்மர் அரசாங்கம் உறுதி அளித்துள்ளது.

அகதிகள் அந்தஸ்து தொடர்பான 1951ஆம் ஆண்டு உடன்படிக்கையிலோ அல்லது அதன் 1967ஆம் ஆண்டு நெறிமுறையிலோ மலேசியா கையெழுத்திடவில்லை என்றாலும், சட்டத்தின் ஆட்சி, அனைத்துலக மனிதாபிமானத் தரநிலைகளை நிலைநாட்டும் வகையில் அனைத்து நடவடிக்கைகளும் எடுக்கப்படுவதை ‘மடானி’ (Madani) அரசாங்கம் உறுதிபூண்டுள்ளது. மனித உரிமை மீறல்கள் ஏதுமின்றி, பாதுகாப்பான மற்றும் பொறுப்பான முறையில் இந்தத் திருப்பி அனுப்பும் செயல்முறை நடைபெறுவதை உறுதிசெய்ய, ஒவ்வொரு நிலையிலும் தீவிரமாகக் கண்காணிக்கப்படும் என்று புதன்கிழமை (அக்டோபர் 21) நாடாளுமன்றத்தில் எழுத்துப்பூர்வமாக அளித்த பதிலில் அவர் குறிப்பிட்டார்.

ஜிம்மி புவா வீ சே (PH-டெப்ராவு) எழுப்பிய கேள்விக்கு அவர் இவ்வாறு பதிலளித்தார். 5,000 ரோஹிங்கியா அகதிகளைத் திருப்பி அனுப்பும் அரசாங்கத்தின் திட்டம், அதற்கான வழிமுறைகள், காலக்கெடு மற்றும் இந்தச் செயல்முறை ஒழுங்கான மற்றும் மனிதாபிமான முறையில் நடைபெறுவதை உறுதி செய்வதற்கான உத்தரவாதங்கள் குறித்து அவர் வினவியிருந்தார். குடியேற்றத் துறை தடுப்பு முகாம்களில் உள்ள 5,000 மியான்மர் அகதிகளை, கட்டம் கட்டமாகத் திருப்பி அனுப்பும் திட்டத்தை அமைச்சகம் செயல்படுத்தி வருகிறது. இத்திட்டத்தை, குடியேற்றத் துறை மற்றும் பிற தொடர்புடைய அமைச்சகங்கள் மற்றும் முகமைகளுடன் இணைந்து அமைச்சகம் ஒருங்கிணைக்கிறது.

முதல் கட்டமாக, செப்டம்பர் 29 அன்று 1,476 மியான்மர் அகதிகள், மியான்மர் அரசாங்கத்திற்குச் சொந்தமான கப்பல்கள் மூலம் அந்நாட்டிற்குத் திருப்பி அனுப்பப்பட்டனர். இந்த முதல் கட்ட நடவடிக்கை, மலேசிய மற்றும் மியான்மர் அரசாங்கங்களுக்கு இடையிலான ஒப்பந்தம் மற்றும் ஒத்துழைப்பின் ஒரு பகுதியாகும் என்று சைஃபுதின் தெரிவித்தார். மியான்மர் அரசாங்கம் அகதிகளை அடையாளம் காணுதல், ஆவணப்படுத்துதல் மற்றும் சரிபார்த்தல் ஆகிய பணிகளை முடித்த பின்னரே, அடுத்தடுத்த கட்ட நடவடிக்கைகளைத் தொடர அமைச்சகம் உறுதிபூண்டுள்ளது. மேலும், இரு நாடுகளுக்கும் இடையிலான தளவாடத் தயார்நிலை மற்றும் செயல்பாட்டு ஒருங்கிணைப்பும் இதற்கு அவசியமாகும் என்று அவர் கூறினார்.

இந்தத் திருப்பி அனுப்பும் செயல்முறை தன்னிச்சையாக மேற்கொள்ளப்படவில்லை என்றும், மாறாக மியான்மர் அரசாங்கத்துடன் நேரடி பேச்சுவார்த்தைகள் மற்றும் ஒருங்கிணைப்பு மூலமே முன்னெடுக்கப்படுகிறது என்றும் அவர் மேலும் தெரிவித்தார். இந்தச் செயல்பாட்டில் அடையாளம் காணுதல், அடையாளம், அந்தஸ்தைச் சரிபார்த்தல், பாதுகாப்புச் சோதனை, ஆவணப்படுத்துதல், இடமாற்றம் செய்வதற்கு முன்னதாக மியான்மர் அரசாங்கத்தால் மியான்மர் அகதிகளைச் சரிபார்த்தல் உள்ளிட்ட பல நிலைகள் அடங்கியுள்ளன என்று அவர் கூறினார்.