ராஜ்கோட்:

குஜராத்தில் அதிர்ச்சியை ஏற்படுத்தும் வகையில், தனியார் மகப்பேறு மருத்துவமனையின் கண்காணிப்புக் கேமரா (CCTV) அமைப்பு ஹேக் செய்யப்பட்டு, அதிலிருந்து நூற்றுக்கணக்கான நோயாளிகளின் காணொளிகள் திருடப்பட்டுள்ளன.

இந்த காணொளிகளில் கர்ப்பிணிப் பெண்களுக்கு மேற்கொள்ளப்பட்ட மருத்துவ பரிசோதனைகள் மற்றும் ஆலோசனை நேரங்களின் காட்சிகள் அடங்கியிருந்ததாக அதிகாரிகள் தெரிவித்துள்ளனர்.

CCTV காட்சிகளை திருடி, ஆபாச தளங்களுக்கு விற்ற கும்பல்

விசாரணையில், இந்தக் காட்சிகளை ஹேக் செய்த சைபர் குற்றவாளிகள் ஒரு பெரிய அளவிலான வலைப்பின்னலை உருவாக்கி, ஆபாச இணைய தளங்களுக்கு பணம் பெறும் நோக்கில் விற்பனை செய்திருப்பது தெரியவந்துள்ளது.

அந்தக் காணொளிகளின் விலை ரூ.700 முதல் ரூ.4,000 வரை நிர்ணயிக்கப்பட்டு, சில காட்சிகள் ‘டெலிகிராம்’ செயலியின் வழியாக கட்டணம் செலுத்தும் இணைப்புகள் மூலம் விற்பனை செய்யப்பட்டுள்ளதாக சைபர் குற்றப்பிரிவு தெரிவித்துள்ளது.

யூடியூப்-இலும் வெளியீடு: பெரும் அதிர்ச்சி

திருடப்பட்ட சில காணொளிகள் யூடியூப் தளத்திலும் வெளியிடப்பட்டதால், பொதுமக்கள் மற்றும் நோயாளிகள் கடும் அதிர்ச்சியில் உள்ளனர். சம்பவம் வெளிச்சத்துக்கு வந்தவுடன், யூடியூப் பல காணொளிகளை உடனடியாக நீக்கியது.

50,000க்கும் மேற்பட்ட மருத்துவமனை காட்சிகள் ஹேக் செய்யப்பட்டன

முதல் கட்ட சைபர் ஆய்வில், நாட்டின் பல்வேறு நகரங்களில் உள்ள மருத்துவமனைகளின் CCTV அமைப்புகளும் இதே கும்பலால் ஹேக் செய்யப்பட்டிருக்கலாம் என சந்தேகிக்கப்படுகிறது.

மொத்தத்தில், 50,000க்கும் மேற்பட்ட மருத்துவமனை காணொளிகள் இணையதளங்களில் கசிந்திருப்பதாக சைபர் பாதுகாப்பு நிபுணர்கள் தெரிவித்துள்ளனர்.

2024ம் ஆண்டிலிருந்து தொடர் வக்கிரச் செயல்

சைபர் போலீஸ் தகவலின்படி, இந்த சட்டவிரோத நடவடிக்கைகள் 2024 ஜனவரி முதல் டிசம்பர் வரை தொடர்ந்து நடைபெற்றுள்ளன. தற்போது மகாராஷ்டிரா, குஜராத், தமிழ்நாடு மற்றும் கர்நாடகா மாநிலங்களில் இந்தக் கும்பலின் தொடர்புகள் குறித்து விசாரணை தீவிரப்படுத்தப்பட்டுள்ளது.