மலேசியாவில் நடப்பாண்டு ஜூலை 15-ஆம் தேதி வரையிலான காலத்தில், சமூக ஊடகங்களிலிருந்து 99,693 மோசடி தொடர்பான பதிவுகள் நீக்கப்பட்டுள்ளதாகத் தொடர்புத் துறை துணை அமைச்சர் டியோ நீ சிங் தெரிவித்துள்ளார்.

ஜோகூரில் உள்ள தாமான் தேசாய் ஸ்கூடாய் சமூக மன்றத்தில் நடைபெற்ற பொது நிகழ்ச்சி ஒன்றில் சனிக்கிழமை பேசுகையில் அவர் இத்தகவலைப் பகிர்ந்துகொண்டார்.

கடந்த 2025-ஆம் ஆண்டு முழுவதிலும் நீக்கப்பட்ட 98,503 பதிவுகளுடன் ஒப்பிடுகையில், இந்த ஆண்டின் அரையாண்டிலேயே நீக்கப்பட்ட பதிவுகளின் எண்ணிக்கை அதைவிட அதிகரித்துள்ளது என்று அவர் சுட்டிக்காட்டினார்.

சமூக ஊடக நிறுவனங்களின் ஒத்துழைப்பு

இந்த ஆண்டில் இதுவரை மேட்டா, டிக்டாக், யூடியூப் போன்ற முன்னணி சமூக ஊடக நிர்வாகங்களுக்கு, மோசடி தொடர்பான 106,268 பதிவுகளை நீக்குமாறு அரசாங்கம் கோரிக்கை விடுத்துள்ளது.

கடந்த ஆண்டு முழுவதும் இத்தகைய கோரிக்கைகளின் எண்ணிக்கை 102,113-ஆக மட்டுமே இருந்தது.

மலேசிய தொடர்பு மற்றும் பல்லூடக ஆணையம் (MCMC) கோரிக்கைகளை முன்வைத்தாலும், அவற்றை ஆய்வு செய்து நடவடிக்கை எடுக்கும் இறுதி அதிகாரம் சம்பந்தப்பட்ட சமூக ஊடக நிறுவனங்களிடமே உள்ளது என்றும் அமைச்சர் தெளிவுபடுத்தினார்.

இருப்பினும், மோசடிகளைத் தடுக்கும் நடவடிக்கைகளில் சமூக ஊடக நிர்வாகங்கள் சுமார் 90 விழுக்காடு முழு ஒத்துழைப்பை வழங்கி வருவதாக அவர் பாராட்டு தெரிவித்தார்.

‘ஒரு இல்லம் ஒரு தேசியக் கொடி’ இயக்கம்

தொடர்ந்து நாட்டின் தேசிய மாதக் கொண்டாட்டங்கள் குறித்துப் பேசிய அமைச்சர், தேசியக் கொடியை முறைப்படி பறக்கவிடுவதற்கான விதிகளைப் பொதுமக்கள் சரியாகப் பின்பற்ற வேண்டும் என நினைவூட்டினார்.

மேலும், ஆகஸ்ட் முதல் செப்டம்பர் மாதம் வரை அரசாங்கத்தின் தகவல் துறை சார்பில் நடத்தப்படும் ‘ஒரு இல்லம் ஒரு தேசியக் கொடி’ இயக்கத்தின் மூலம், பொதுமக்கள் அனைவரும் தங்கள் வீடுகளில் தேசியக் கொடியை ஏற்றித் தேசியப் பற்றை வெளிப்படுத்த ஊக்குவிக்கப்படுவதாகவும் அவர் கூறினார்.