கோலாலம்பூர்: நேபாளத்தில் கடந்த மாதம் ஏற்பட்ட கடுமையான வெள்ளப்பெருக்கைத் தொடர்ந்து, இன்னும் கண்டுபிடிக்கப்படாத 55 மலேசியர்களின் நிலை குறித்து பிரதமர் அன்வார் இப்ராகிம் அந்நாட்டுப் பிரதமரிடம் பேசியுள்ளார். சீனாவிற்கு மூன்று நாள் அரசுமுறைப் பயணமாகப் புறப்படுவதற்கு முன்னதாக, இன்று  நேபாளப் பிரதமர் பலேந்திர ஷாவுடன் நடத்திய தொலைபேசி உரையாடலின் போது இக்கோரிக்கையை முன்வைத்ததாக அன்வார் தெரிவித்தார்.

தங்கள் அன்புக்குரியவர்கள் குறித்த தகவலுக்காகக் காத்திருக்கும் குடும்பத்தினரின் கவலைகளைத் தான் பகிர்ந்துகொண்டதாகவும், தொடர் தேடுதல் முயற்சிகளுக்குப் பிறகும் பாதிக்கப்பட்டவர்கள் கண்டுபிடிக்கப்படாவிட்டால் ஒரு முறையான நடைமுறையை (mechanism) உருவாக்க வேண்டும் என்று முன்மொழிந்ததாகவும் அவர் கூறினார்.

பாதிக்கப்பட்ட குடும்பங்கள் சட்ட, நிதி மற்றும் நிர்வாக ரீதியான விவகாரங்களைக் கையாள்வதற்கு இது முக்கியமானது. இந்தப் பரிந்துரை குறித்த விவரங்களுடன் பிரதமர் ஷாவிற்கு அதிகாரப்பூர்வ கடிதம் ஒன்றை அனுப்புவேன் என்று அவர் தனது ஃபேஸ்புக் பதிவில் குறிப்பிட்டுள்ளார்.

அங்குள்ள சூழல் மிகவும் கடினமாக இருப்பதாகவும், அந்தப் பேரிடர் மற்றும் அழிவின் அளவு சுனாமியைப் போன்றது என்றும் பிரதமர் ஷா விவரித்ததாக அன்வார் கூறினார். இருப்பினும், சவாலான சூழல் நிலவினாலும் தேடுதல் பணிகள் தொடர்ந்து நடைபெறும் என்று ஷா அவருக்கு உறுதியளித்தார். மேற்கொள்ளப்படும் ஒவ்வொரு முயற்சியும் நல்ல பலனைத் தரும் என்றும், குறிப்பாகக் காணாமல் போன அந்த 55 மலேசியர்களின் குடும்பத்தினர் மிகவும் ஆவலுடன் எதிர்பார்க்கும் தெளிவான தகவலை வழங்கும் என்றும் நான் நம்புகிறேன் என்று அன்வார் கூறினார்.

பாதிக்கப்பட்டவர்களைத் தேடும் பணிகளில் ஈடுபட்டதற்காக நேபாள அரசாங்கம், அதிகாரிகள் மற்றும் மீட்புக் குழுவினருக்கும் அன்வார் நன்றி தெரிவித்தார். இந்தப் பேரிடரில் 1,400-க்கும் மேற்பட்டோர் உயிரிழந்துள்ளதாகவும், 6,000-க்கும் மேற்பட்டோர் இன்னும் காணாமல் போயுள்ளதாகவும் சர்வதேச ஊடகச் செய்திகள் தெரிவிக்கின்றன. சீன அரசாங்கத்தின் அழைப்பின் பேரில் அன்வார் இன்று சீனாவுக்குப் புறப்பட்டுச் சென்றார்.