தாவாவ் மாவட்ட கல்வி அலுவலகத்தில் (PPD) தனது பயிற்சியை (Practical Training) மேற்கொள்வதற்காக மோட்டார் சைக்கிளில் சென்று கொண்டிருந்த 24 வயதுடைய UiTM ஷா ஆலாம் பல்கலைக்கழக மாணவர் ஒருவர், நேற்றைய தினம் நிகழ்ந்த சாலை விபத்தில் சம்பவ இடத்திலேயே பரிதாபமாக உயிரிழந்தார்.
மஸ்லான் துவோ என்ற அந்த மாணவர், நேற்று காலை 7.30 மணியளவில் ஜாலான் தாவாவ்-பொம்பலாய், கம்போங் ஹாஜி மாதாஹிர் அருகே தனது யமஹா 135LC மோட்டார் சைக்கிளில் சென்று கொண்டிருந்தபோது இந்த விபத்து நேரிட்டதாக தாவாவ் மாவட்ட பதில் போலீஸ் தலைவர் சுப்ரிடெண்டண்ட் விலிங்டன் என்சானா வாட் தெரிவித்தார்.
கம்போங் சுங்கை இமாமிலிருந்து ஃபெல்டா உமாஸ் சுகாதார மருத்துவமனைக்குச் சென்று கொண்டிருந்த 32 வயதுடைய அரசு ஊழியரான பெண் ஓட்டி வந்த மிட்சுபிஷி ட்ரைடன் (Mitsubishi Triton) ரக 4-வீல்-டிரைவ் வாகனம், திடீரென கட்டுப்பாட்டை இழந்து எதிர்த் திசைப் பாதைக்குள் நுழைந்து மாணவரின் மோட்டார் சைக்கிள் மீது பலமாக மோதியுள்ளது.
இந்த மோதலின் தாக்கத்தால் மாணவரும் அவரது மோட்டார் சைக்கிளும் சுமார் 5 மீட்டர் தூரத்திற்குத் தூக்கி வீசப்பட்டனர். சம்பவ இடத்திற்கு வந்த மருத்துவ அதிகாரி மாணவர் ஏற்கனவே இறந்துவிட்டதாக உறுதிப்படுத்தினார். மோதிய கார் சாலையோரக் கால்வாயில் தலைகீழாகக் கவிழ்ந்ததில், அதன் பெண் ஓட்டுநருக்கும் தோள்பட்டை மற்றும் வலது கையில் பலத்த எலும்பு முறிவு ஏற்பட்டு தாவாவ் மருத்துவமனையில் தீவிர சிகிச்சை பெற்று வருகிறார்.
